بهجة الدنيا وزخرفها يزول=إفهموا ياهل الدراية والعقول


وحيلة المضطر للأمر الأمر=منتهاها كان تقصر أو تطول


وغير وجه الرب فاليوم العظيم=ما تواجه غير طيبة الفعول


اغنموا فرصات بهجات العمر=قبل يومٍ ما تخير بالحلول


ولا تحسف وأنت لك فعلٍ جميل=يقبله رب الملا يوم القبول


لا تناظر غير وجه الله ولا=تنقفل في باب بهجتك القفول


الحظيظ اللي على مر الزمان=بين حظه والمعزه ما يحول


وغايته يكظم بها كظم الجمال=وينتبه عن قولة الواشي يقول


ينتبه لورود وقته والصدور=والربيع اللي تقفاه المحول


ويدري أن الله ضمن ثنتين دوم=الحيا والموت حولٍ بعد حول


والليالي بين نقص وبين زود=والغنيمة والغنائم بالفلول


وما تهمه عدوة السبع جهراً=ويتوقع عدوة السبع الختول


وما يطاول راعي الحق المصيب=وبالمهامل يثني عقال الذلول


وكل ما بين العرب سمع الجدال=ما يجاري في ردا العقل الخبول


ولو تقوم بوجهه أحداث الزمان=ما تهزه وقعة أيامٍ تهول


والعدو اللي لبس ثوب الصديق=ما درى إنه من نزولٍ في نزول


من ربا في دار ما يرعى غلاه=في حمانا لا يصول ولا يجول


عام الأول شافو الناس العجب=عقب ما سيطر على الخلق الذهول


والعميل اللي معك وإلا عليك=يسبر الغره على حسب الميول


يسبر الغرات في حالٍ وحال=مخلفٍ كل الطرايق والوصول


دارنا بالشرع ودروس الضحى=شرعت كل المدارس والفصول