تضحك لك الايام بالكبر والزود =ولا حسبت حساب سود الليالي  

ما تدري انك بين وارد ومارود =وتطلق عنان المخطيه ما تبالي  

وبعض الكلام هبال وعقال منقود= يفرح به الشامت على كل حالي  

ومن رام عز النفس يصبر على الكود =ليت أوّ لات الوقت مثل التوالي  

بيض السوالف لا يجي ردها سود =اقضب مقام ٍ طول الايام عالي  

كم واحدٍ من جاير الجور ملهود =يضحك وكنه من عنا الوقت خالي  

ما يندم اللي يفعل الطيب والجود =أيضا ولا دمّاح زلة موالي  

اقضب لسانك عند غايب وموجود =وتفوز برضا الله عزيز الجلالي  

الصبر له حدٍ مع الناس محدود =والعز دايم هو صعيب المنالي  

احذر تسَمّع هرج حاسد ومحسود= هم ٍ حرام وهم عنده حلالي