طاب فال القصيد اللي قداه الشعور =  بالثنا للكريم معز قدر الكرام 


سيّد الجود محيي مجد كل العصور = ثاقب النظره بعيد المدى والمرام 


أبو خالد ملاذي في جميع الأمور = ضحكة حجاجه تبدد هموم وظلام


نجدة المستغيث ويسر كل معسور = كل طيب انقسم له منه راس السنام


كل ما يذكر اسمه والمداخن تدور = زادها طيب مع ما يتبعه من كلام 


الثنا والولا تبديه كل الصدور = لاسم سلطان ولفعله رفيع المقام


من دجا ليل ياسه شاف سلطان نور= والفعول العظايم للرجال العظام


أنت نور يبشر بالسعد والحبور = من تحوطه بعطفك طاب حظه وقام 


أنت نارٍ على من فيه ظلمٍ وجور = ونار خصمك تحولها لبرد وسلام 


أنت نظرتك عليا عن بريق القشور = مالك بغير جزلات الخصال اهتمام


نهر جودك عليه الناس ورد وصدور = للمحاويج مدك مثل وبل الغمام 


بذرك الطيب وانعم  في حصاد البذور = الولا والمحبه من جميع الانام 


فيك ياسيدي شعري ماهوب معذور = كان ما جا لكل الشعر صدرٍ وهام


أمدحك حب وإلا ما بحالي قصور = بك يطيب القصيد وشاعره ما يلام