على الشريعه مجد الادوار مخبور = أدوار ربي رافعٍ مستواهن


الدور الأول صار له بالوطن دور = ساده " محمد " بالعدل ما تماهن


والثاني اللي جدد العهد منصور = " تركي " وتركي قاد ركبه واراهن


والثالث اللي فك داره من الجور = " عبد العزيز " احياض داره ملاهن


عدلٍ وأمانٍ صار له بالوطن طور = بثوبٍ من المجد الحنيفي كساهن

الحل شفته يابو راشد على    السـور   =     في فرجة المصمـك بقايـا    نباهـن


ثلاث حلن في الجزيره بـلا  جـور   =     ياطيب مبداهـن وماكثـر    عطاهـن


ريف الضعيف اللي من الظلم ممرور   =     وعز لمن صـان ألشريعـه   معاهـن


تاريخهن في صفحة العـز   منشـور   =     سمي جـدك يابـو راشـد    بداهـن


وانا اشهد ان اللغز جزل  ومحكـور  =      مير الفكر بالطيـب دلـل وجاهـن   ‏

ياللي بدعت اللغز وافي ومشكور  =      الله يجـملنـا نـجــدد  ولاهــن


ثلاث اخرهن لها النور   دستـور  =      وارواحـنا لعـيونها   من فــداهن


ترثة معزي عقب دابان   والكـور    =    وام الرياض وروسا"الله وراهـن


روسا"تورث طيب كابر لمكبـور    =    ياجعل ربي يسعد النـا   مساهـن


هذي محل الظن والنور    يانـور     =   الله يجملنـي مـادور    سواهـن

حراير "من طهرهن كنهن    الحور    =    متفاوتـات بعمرهـن و بحلاهـن


حراير" خلقن بلا ارقاب   ونحـور    =    وكم عاشق" من دم قلبه    رواهـن


هلهن هل الطولات والعلم والشور    =    كم فارس" عدوه ماجـا    حماهـن


في خدمة الإسلام شفنالهـن  دور    =    و فالثالثه فاقن جميـع   انظراهـن


دوله سعوديه لها الشرع   دستـور     =   وفي ظل ابومتعب تطاول مداهـن

باشارك برمعه ليا جانـي   الـدور    =    دام السوالـف عالـي   مستواهـن


مراحل الدوله على سنين و   شهور    =    قامت و تاريخ العرب ما  ناسهـن


الاولـه و الثانيـه مابـه    جـور     =   و الثالثه على السعد من    وراهـن


بقيادة آل سعود و العلـم   مخبـور    =    قوم مـع عدوانهـا مـا    تداهـن


عسى معزي طيب الراي و الشور    =    جمايله في الشعب يلقـا   جزاهـن

يامير حل اللغز هيـن   ومقـدور  =      حراير قد كمـل الله حلاهـن


الأوله دولة لها قـدر    مخبـور      =  هي ساس للتالي وهي   مبتداهـن


والثانيةكانت على مد    وجـزور  =      لكنها نبـراس فـي    مستواهـن


والثالثة حصن مشيـد   بدستـور   =     مسك الختام اللي ختم   مبتغاهـن


ثلاث مزيونات يمشن على الدور    =    متساويـات بزينهـن    وبنقاهـن

حل اللغز يبغي علـم والعلـم   نـور   =     والغر أنا منهـن وعمـري   فداهـن


النايفات الغـر فـي أسـم مشهـور    =    دولة هل العوجأ سعـودي   أنتماهـن


الأوله حر دخـل سـور   وقصـور    =    راهـن أبوتركـي وكمـل   بنـاهـن


عاش الملك عاش الوطن خير دستور    =    حكمه بشـرع الله رفـع   مستواهـن


مشكور يامير الفخر الـف   مشكـور  =      من دونك الابيات ينقـص    حلاهـن

يااللي كتبت اللغز مشكور مشكور    =    باابيات شعر ٍعـــــالـي ٍٍ   مســــتواهـن


في عهدهن ماحدٍ رأى الظلم   والجور      =   والعدل رفرف فوق عالي   سماهن


ثنتين فاتن والزمن كان لـه    دور   =     الله يـــــرحـم كـل شــــــيـخ ٍحمـــــاهـن


والثالثه عشنا بها بأمن    وسـرور   =     الله يعــــــز اللـي بــــروحـه    فــــداهـن

حراير نبتت على النار والنور=تحدث الكون الفسيح ببهاهن


من حكمة الخلاق ولدن بديجور=وبدد ظلام الليل عالي سناهن


حسابهن في خانة البضع محصور=وبعصرهن غطن على من سواهن


خوات مختلفات باحوال وعصور=متشابهات بوصفهن وبنماهن


ياللي بحل رموز الالغاز مشهور=هات الخوات الغر والا حداهن