هاجس الشعر يجبر صاحبه نظم جيل=خص كانه تهيا فيه شف ومجال


 ودي اقطف من البستان زهرٍ جميل=يوم حان المجال ويوم حان السؤال


وجهتي صوب شاعر ينطق السلسبيل=الأمير المعرّب من عمامِ وخال


ما تجيب الشوارد منه غير الجزيل=صيدته دوم جزله ما يصيد الهزال


مثل وادي إذا ماجادغيثه يسيل=وقو دفعه يجي ع قد علو الجبال


طاري الطيب يذكر جيل من بعد جيل=وانته شخصك يساوي عندنا راس مال


وللكحيله من الفرسان فارس أصيل=يعجبك ضرب سيفه في زحام النزال


اترك اللي حياته بين قايل وقيل=واتبع اللي بفعله كل ما قال طال


للدروب البعيده شد م السحم حيل=وسط حر القوايل ما تدّور ظلال


سمحة الوجه مع غارب وعنقٍ طويل=ما ظمت بس فيها م الجوازي خصال


كل ما طال صبري قلت صبرٍ جميل=اصبري يا كتوفٍ ترتكي للثقال


كل جرحٍ وله وقتٍ بطبه كفيل=وكل وقتٍ تخصه دولةٍ مع رجال


ما تحمّل المذله غير نفس الذليل=والنفوس العزيزه تنفرد بالخصال


أتّكل في حياتي عالكريم الوكيل=وكل شيٍ سواه نهايته للزوال


جرّب الوقت قلبي ثم خذ له دليل=بأن الإنسان أفضل ميزته الاعتدال


وكل شيِ برايك فيه تقدر تميل=بس باللي توده ما تحب الجدال


طلعة البر تشفي كل قلبٍ عليل=آتلذذ بجوّه يوم عندي مجال


واجمع الخيط الأصفر مع مباهير هيل=وأغنم بفك صوعي عقب فوح الدلال


في مكانٍ فسيحٍ عصر عقب المقيل=ما مشى في قفاره غير ظبي وغزال


ريت في الشعر سحر وصار عندي عميل=كلما زاد حده أحكمه بابتهال 

فذ شرد القوافي ما وفا لي بكيل=في مقامٍ كبير ودّنا بالكمال


اشرف الشعر شعرٍ في مقامٍ مهيل=يزعج الصوت يمي فوق روس الطوال


طار له طير شعري واستثار الجفيل=وامطر الوادي اللي بالمباهيل سال


مستحيل ان رد القافيه مستحيل=الله اللي خلقنا ما علينا محال


همةٍ بالمعالي ما تحط وتشيل=الله اللي موفقنا عزيز الجلال


بالوفاء يا غياهيب الهدف لك نبيل=ما علينا من اللي في دبرهم وبال


نرقب المرقب اللي عسر ماله سبيل=ونستحل المواقع ثم تصبح حلال


تالب الوجد مجدٍ فيه ما أرضى بديل=وادري انه على غيري عسير المنال


رام غاية مرامي مجد ماله مثيل=وصار فالي وانا له طول الايام فال


شدني له مقامه قبل قربه خليل=والوفا والكرامه في كرام السبال


دلني بالدلال وهاجسي مستخيل=وفي ثرى نجد كله هل راس الهلال


ما يطفي فؤادٍ من غرامه غليل=غير والله بعيني شوف هاك القبال


من يزاعم بزينه نور عيني هبيل=ان تساوو فرق فرق الضحى بالجمال


والله اني رهين عيون رمشٍ ظليل=كاملٍ بالوفاء والحسن في كل حال


من جمال الخلايق فيه كل الحصيل=ما بقى شي للي يدّعون الكمال


غيرنا في المحبه ما يذبل ذبيل=ونفهم ان الجزاله بالوفا للجزال


كل وصفٍ أشوفه في حبيبي قليل=تاخذ الحور من زينه بقايا النفال


خف دم ورزانة راس عقلٍ ثقيل=ما تلاقي بزرع الروح أبد ما يقال


جعل يفدى حبيبي ناسعات الجديل=اشرق الشف يمه والمساكن شمال


أذكر الله وأهلل بالختام تهليل=في حياتي لغير الله ما أصغيت بال