على هوى خاطري سيّرت الاقلامي=وتوجت صافي الورق باجمل معانيها


مجروح قلبٍ شكى لوعات الايامي=يشقا ويفرح وتلعب به لياليها


دايم غريقٍ يعوم ببحر الاوهامي=يرجي السعاده وهي صعبٍ مراجيها


ماحدٍ من الناس له طول الفرح دامي=والنفس ما كل ما تعطى بيرضيها


معروف ما به سرابٍ يروي الظامي=بس الأماني توسع صدر راعيها


حنا والايام دايم سلم وخصامي=وسعادة العمر عقب الحزن نجنيها


يا موّهم بالموده جرحك الدامي=اقطع رجا النفس وإلا جُد بامانيها


ولا تدنّس بكفه كفك السامي=تبي الموده واشوفك قمت تخطيها


واللي بذر بذرته بالصيّهد الزامي=يموت زرعه ليا هبت سوافيها


لو كان صوت الوتر طبٍ للآلامي =ان كان نفسي بها دايم مسليها


لا شك ريح العبير وحلو الانغامي=يرحل بروحي ويغنيها ويطغيها


في نور بدر الفرح تشتيت الاظلامي =والنفس لا هنتها حققت أمانيها


تسبح بماضي خيالٍ ما بعد نامي=تخضع له الروح حاضرها وماضيها