يابن الذي وحد شتات ألجزيره=فيك انت شفنا بالفكر ما فقدناه
حزمٍ وجزمٍ بالامور العسيره=فيها رضا الله قبل خلقه لقيناه
انشد عن البيت السعودي خبيره=وانت الخبير اللي حمى عزة حماه
شربت من غر السحايب غديره=والدار ما يصخي به اللي شرب ماه
حبك وطن شعبٍ حظوظه كبيره=يشوف بك تحقيق مجدٍ تمناه
امبايعينك بالبصر والبصيرة=باوراق بيض قلوبهم حبك أمضاه
مكارمك في كل حالٍ كثيره=على الوطن وأهل الوطن شيء شفناه
قول وفعل طوّر مسار المسيره=على طريق المجد ما ماتت خطاه
يالواصل العادل نظيف السريره=قلبك معلق في رجا الله وتقواه
يهدي لك الدار السعودي عبيره=منهجك دين الله على الحكم مبداه
انت الأمل عند الجموع الغفيره=وفيك الأمل يكبر وتكبر نحاياه
هذا كلام الناس ما فيه غيره=مجدك ظلال الدار بادناه واقصاه
|