مشاعر.. محب..حاولت أن تكون شعراً تجاه سموكم الكريم ولأنك الكريم سوف تتجاوز تقصير المحب.

يا سيدي طابت لياليك بالخير =يوم ان حب الخير عندك جبله  


وردتني يا سيدي جمة البير =وامطر سحابك مزنةٍ مستهله  


قومتك تسوى يا سليل المشاهير= جودك ومعروفك تظللت ظله  


يوم انها قدمي سراب ومعاصير= تلفتت عيني لدربٍ تدلـه  


أنا المجرب يا زبون المخاسير= وأنا الذي شفت الكرم في محله  


لا منها ضاقت علي المعابير =ما عندي إلا الله ثم انت استدله  


أجيك لو همي كبر هضبة النير= واروح منك وخطوتي مسفهله  


دوّرت لي يوم ٍ يجي منك تقصير= في ذمتي ما شفت هاليوم لله  


فزعتك تشرح ضيقة الصدر يا مير= إلا بعد تروي ظماه وتعله  


وانا بصدري لك عباره وتعبير= عندي عليها يا بو راشد أدلـه  


الآدمي وليا بلته المقادير= ينصاك كان انه يبي برد غله  


أي والله انت اللي تميز عن الغير= نجم ٍ تعديت النجوم المطله  


دامك بخير اعرف ترى ربعك بخير= حيث ان كفك تبذل الخير كله