هذه القصيدة إهداء إلى صاحب السمو الأمير عبدالعزيز بن سعود بن محمد آل سعود \"السامر\" حفظه الله رجل المواقف المشرفه

راكب اللى من حفيزه للوازم محتسينه =كامل التوصيف وملقب ابتسمية السفاري  


موتر ٍ لاجل اللوازم والمواقف مشترينه  =ما شريته للتكشخ والمظله والذواري  


بالقوايل نركبه مهتم من ضغط المكينه= وان سرينا ما تضيعنا مع الصحرا المساري  


نصه اللي عز من ينصاه فارغةٍ يدينه=  ناصر المظلوم والمحتاج والمقسوم جاري  


سيدي عبدالعزيز اللي عسى تبطي سنينه=  دام راسه حي ما نهتم من سود الغداري  


ولا نصيته باغيّلي لازم ٍ فيه استعينه = يعلم الله غير تقدير وسلامٍ يا مشاري  


يوم اقبّل متن سيد الجود واصافح يمينه = والله اني كني اللي مالكٍ بنك التجاري  


متن شيخ ٍ تلتجي فيه المتون اللي متينه=  من تذرى في سموه ما شكا شهب الضواري  


أفتخر في رفقة اللي عز كل مرافقينه=  وعز من ينصاه من كل الخليج إله الطراري  


ما خسر بامر الولي من صار ابو راشد عوينه= راعي الفزعات والمدات في طيبه انماري  


طيب ابو راشد عليه كل ناسٍ خابرينه  =راعي الوقفات والمعروف في طيبه انثاري  


للأمور الكايده شيخ المراجل ذاخرينه = هو ذراي وملتجايه هو حزامي والسواري  


جاذبه سيد الوفا والمجد زيزوم السفينه=  كاسب المعروف أبوه سعود للطولات شاري  


بالوصايف والجمايل فيه من والده عينه = من وفاه ومن كرمه وفيه من طبعه مواري  


حاتم آل سعود عند الباديه واهل المدينه=  ذا لقب راعي الكرم معروف لي جيبله طاري  


وبالختام أرجع وأكرر ما نصيته مستعينه=  يعلم الله غير تقدير وسلامٍ يا مشاري