لا تستحي قل أحبك تعبت أسماعي     =أرجوك لا تستحي يا صاحبي قلها


اطلق أحجاجك وخله يرسل الداعي    =فرحة لقانا ترى ما بيك تقتلها


ضاح إبجبينك لعيني نور وإشعاعي         =وعيوني لشوفتك مع خافقي ولها


خذ جرحك العام بي من هاجس أو جاعي       =وإّلا يابو ضحكةٍ بيديك كملها


وإن قالوا الناس عمري بالهوى ضاعي         =بانت لك أسرار قبل اليوم تجهلها


يا صاحبي هاجسي بك دايمٍ واعي                =فيك إنت نفسي تجادلني وأجادلها


مرٍ تكون الرعية والهوى راعي                  =ومرٍ أكون الرعية وأنت كافلها


أفرح بطيفٍ يجيبك وأرفع شراعي                =والنفس بوعودك اللي كذب عللها