تحتار الكلمات في أن تُجسّد عمق الأثر في ذاتي ، فرثاء إنسان مثل عبد الله بن محمد بن سعود الكبير ، هو رثاء لمكارم الأخلاق والقيم التي تجسدت في شخص سموه ــ رحمه الله نودعها اليوم تاريخاً أشرق في تعامل الرجال ، وأضاء في سماء المروءة ، فأفاضت ردود الفعل في ذاتي كلمات تتقاصر عن البلوغ لمآثر سموه ، وتدلف أمام أخلاق الرجال في حياء من التقصير ... هي قصيدة أودعتها حشاشة قلبي رثاء في خالي ووالدي صاحب السمو الأمير عبد الله بن محمد بن سعود بن محمد بن سعود الكبير ـــ رحمه الله

سادس عشر ثمانية شهر شعبان=أربع طعــــش يــــوم الخــمـــيس أفجعوني


قالوا تعال وقمت مدهوش حيران= أركـــض ودربـــــي مــا تــــشوفه عيوني


لقيت ناسٍ دمعهم فوق الأوجان=وعــضت علـــى بـــسرة إبهامي سنوني


قلت الخبر قالوا توفى كحيلان= يــالـيــتــــهــــم بــالــعــلم مـــا علموني


فقيدةٍ منها يروغن الأذهان =وإلاكــــثــيــر الــــــنــاس مــــا يفقدوني


لو الفقيدة مال ما صرت خسران=مــيــر الخــســــــارة كـــأيــدة بصروني


مصيبةٍ ما هيب تشرى بالأثمان=الله يكـــــون بــعـــون الأســرة وعوني


أبو فهد طير السعد طير حوران=  اقــفـــى وحـــال الــــياس دونه ودوني


مرحوم يا راعي الوفا يا خو سلطان= يـــا مـــودع العــسرة لأهــــلها تهوني


مرحوم ياللي للرجاجيل ميزان=   شايل عـــــن المــعسر ثــــقيل الديوني


مرحوم ياللي ما حدٍ منك زعلان= تضحك وبعـض الـــناس ما يضحكوني


مرحوم ياللي ما بعد قيل غلطان=وله هـــيـــــبة عـــنها الملا يقصروني


يا داخل المسجد قبل وقت الأذان=يــا اللـــي بــك أمجاد العرب يفخروني


بيته من الأجناس ضايق ومليان=نـــــاسٍ تـــروح ونــاس بــه يدخلوني


يا كثر ناسٍ ترتجي منه الإحسان=وقــــت رمــضان لـــعـــادته يرتجوني


مع موتته ما توا ضعوفٍ ويتمان =ونــاسٍ تشيل مــــن الزمــان الغبوني


أبو فهد للطيب والمجد عنوان         =واللــــي مشوا مع طرقـــته يتعبوني


والآدمي مديون والموت ديان=والحــــق منه الناس مـــا يجزعوني


رضيت بالمكتوب من عالي الشان=أمـــــرٍ مـــقــــدّر والـــمقــدّر يكوني


لعل له بالقبر روحٍ وريحان= وروضٍ تمايل فــيه خضر الغصوني


وبدل له السيه برحمة وغفران= يـــا مجـري الأريـاح عقب السكوني


من عقب عبد الله كثير الغلا بان=  بــان الغلا اللي بــالضمير امحزوني


يا لله عساه بجنة الخلد سكان= وفـــي جنب خالي كان مت ادفنوني


عسى الخلف فيما سلف رأس شقران=  أبـــو الجــمــيــع بسـمعته يعتزوني


تمت وصلوا عد ما هل هتان=علـــى الــنبي أعــداد وبل المزوني