والله ما مثلك وطن بين الأوطان = هدي الشريعه والرسل والصحابه

مهبط وحي من غير زودٍ ونقصان = بما نزل الله للعرب في كتابه

بك يرتفع صوت المآذن بالأذان = ودرس الضحى بالدين كلٍ قرابه

فيك المواطن طول الأيام سلطان = في مجمل البلدان يوخذ حسابه 

دارٍ دعايمها على خمس الأركان = الله لها بالدين حط المهابه

من عمرها ما دانت لكاينٍ كان = من كان ناويها يحل القضابه 

إلا لبو تركي على سرج وحصان = سرى على المصمك ونوخ ركابه

هلل وكبر من على راس عجلان = وعقيدة التوحيد راهي زهابه

من عقب ضعف الحال خلا لها شان =  بين الدول عزٍ عظيم ومهابه

وبالعدل رافت وأورقت خضر الأعصان = وتابت من الغارات سحم الذايابه

أنهى مطامع بالوطن شهب الأديان = ما عاد تلقا فيه راعي طلابه

أمن وأمانٍ والعدل زود برهان = ثلاث معهن ما حصل يا هلا به 

عبد العزيز العز في كل الأحيان = عز البلاد وعزز الله جنابه

ماهدت عزوم البطل غير الأزمان = وحد وطن وحد قلوب القرابه

ويوم الوطن لموحد الدار عنوان = الله يقدس وسط قبره ترابه 

وعقبه حكمها عدل ذربين الأيمان = حكمٍ وعدلٍ مجد الامه زهابه

وفي ظل قايدنا فهد مجدنا بان = مجدٍ عظيم كل حي حكابه

فهد العرب فهد السياسه والاحسان = فهد الفصاحه والذكاء والنجابه

مجد الوطن مجد الحكم مجد الاخوان = من تاه في مسرى العداله سرى به