اثنين والعشرين مرت قصيره=مــرت مـرور البرق عـامٍ ورا عــــام

فضايل ٍ من فضل ربي كثيره=مــا تنحصي مــن فوق الأوراق بأقلام

الله يمد بعمر فهد الجزيره=حـامي حمى البيتين في عـسـر الأيــام

آمال شعبه في حياته كبيره=يـقـولـها اللي حــاسبٍ عــد الأرقـــام

فهد العرب فهد العقل والبصيره=لا وقّفت عند المخاليص الاخصام

لا دق شر الخلق بالحرب زيره=واهل السياسه والفكر راحو أقسام

له جانبٍ يضفي على مستجيره=كل الفرج في قومة الفهد لا قام

وكل العباد اليوم من فضل خيره=يحققون اليوم صعبات الأحلام

فهد السياسه حق ما فيه غيره=به تنكس أعلامٍ وبه ترفع أعلام

مواقفه في كل حالٍ مثيره=في غير شرع الله ما صدّر أحكام

نشا على دعم العقيده ضميره=حكمه فصل بين الحقيقه والأوهام

مصير شعب المملكه من مصيره=والمسلمين اللي على دين الإسلام