يا مجير من جار الزمان وتولاه= سلامـــتـــك مـــن كــل عارض صواديف


سلام يا مضفي على شعبه ارداه=ذراً يــــذري عــــن ســـموم وعواصيف


يا منبع الحكمة ويا مصدر الجاه= ســـــلامـــتـــك يــــاللي لكل العرب ريف


أبوك قدّم لك على العز يمناه= يمنــى عــــديمٍ حــــر كــــامل تواصيف


ملك السياسة والوفا والمداراه=والهـــمة العــــليا وبــــــذل المــعاريف


المجد للحكام ما هوب مشهاه= كــــــل يـــــــبيه ونـــــافرٍ منه ومعيف


ومسلّمٍ لك من على راس مبداه=مجدٍ مقامه فـــــوق روس المهاييف


يا عشقة التاريخ والمجد وابناه=الله يجـــيـــرك يـــا زبون المواجيف


يا ماجدٍ تشرق فعوله بدنياه= وتــنور بحـــكمه مظلمات الأطاريف


وطيب الملك من طيب راسه ومجناه=ومانيب أصور شيء للناس ماشيف


نور الملوك اللي عدل في رعاياه=وفك الـــرقاب مـن الغرابيل والحيف


كل الظمايا وارداتٍ على ماه= ومصــدراتٍ بالـروى حموة الصيف


ينهل مناهيل الوفا لا عدمناه=تنــشر له البيضا بروس المشاريف


بحرٍ من الحكمة تلاطم نحاياه=يقلـــط على جمع المعادين ليا خيف


يا الله عسى سود المنايا تعداه=غـــــلاه بقـلوبٍ حوتها السراجيف