صاح درب القدم يا شيخنا والتوى بك=ضاق صدر الطريق اللي مـــواطيك ظله


عنبر المجد طينة ديرته من ترابك=كـــوكـــبٍ والمكـــارم فـــيه مثل الأهلة


العروبة تلوى دربها وانتخى بك= وســـقت خطوة قــدم رجلك بدربٍ تدله


ومنك ما ضاق دربٍ طايلٍ وانتهى بك=كـــل ما شرب خــــطوه وده إنك تعله


بين لين وقساوة من طمع فيك هابك=وفي حجــــاجك سحابة بارقٍ مستهلة


أنت عنا بعيد وجابك الحب جابك=جابك اللــــي يجي مـن بين خلٍ وخله


هاجسٍ ونس اللي ضايقٍ من غيابك= واعـــسى كل طاري عاشقٍ فدوةٍ له


قلت للهاجس اللي زارني يا هلا بك=    مــد يمنا القصيد وصافح الشعر كله


في مناخة شيوخ طويق نوخ ركابك=عـــند سلطان خذ تمرة وفنجال دلة


وقل له إن القصيد منوخ عند بابك=جــاك بـــالحب والتقدير دقه وجله


وش يرد القصايد لا تلوذ بجنابك=فـي حجاجٍ طليق ومجلسٍ ما تمله


والقصايد بنات أفكارنا شوقها بك=كــــل لحظة يزيد وتنثني مسفهله