نجد بلياليها عن أمثالها زود= لو كلّها عند الأوادم ليالي


يا اللي ليالي نجد بعيونكم سود = يا بعدكم عن فهم سر الجمالي


غير الجمال اللي بالأنظار مشهود = إحساس خافي بين غالي وغالي 


نجد بلياليها إلى هبّت النود  = عانقت بالفكر النجوم العوالي


وأدركت معنى سامي النبل والجود =اللي تميز به فعول الرجالي


دار الفهود اللي مناهيجهم كود = اللي منازلهم سنام المعالي 


نجد الوفا .. نجد العطا ماله حدود = نجد المروه والشموخ المثالي 


نجد الهوى المصيون عن كل منقود = بالعصر الأول والعصور التوالي


لي مع لياليها مواثيق وعهود = العسر منها يسر .. والمُر حالي

صح لسانك وللقصد مقصود = ما هو بديكورٍ من الروح خالي 


سحابةٍ فـ إطرافها برق ورعود = ترعد جنوب وبرقها فـ الشمالي 


يهيم معها هاجس الشعر ويعود = لأعظم ينابيع الوفا والكمالي 


مولد قيم وامجاد وسهود ومهود = ومهبط رسالة عظمته والجلالي


ونجد بصحاريها بساتين وورود = على المواطن والرفيق الموالي 


لبّى خزامي نجد عنقود عنقود  = ولبّى صحاريها العراض الطوالي 


احضانها دايم حجا كل مضهود = لا اشتدت العزمات يا همّلالي


كل ذي نعمه بلا شك محسود = ( للأعداء ) محور نقاش وجدالي


يعني ليالي نجد ما تعتبر سود = يوضي سماها نور حق وعدالي