إليا رضا سيدي باقي الدعاوى تهون = وكل العطايا بدون رضاه ماليبها


زعلك يا سيدي يرث بكبدي غبون = والحشمه اللي من أول كنت ضاريبها


ما يجحد الطيب والمعروف كود العفون = وقفتك معنا مكملتن مواجيبها 


يا حي والله ها الهامه وحي العيون = ويمنىً على الطيب قد بانت مضاريبها 


من طلعتك وانت دايم للمراجل زبون = والمرجله ما تشوم إلا الخطيبها


وعطيتك للخوي جزله ولا انت بمنون = وليا عطيت العطيه ما تثاري بها


يا امير ماني من اللي يخلفون الظنون = حسبي على واحد كدر مشاريبها


لا تستمع كلمة الحساد والمغرضون = اللي تودي علوم الكذب وتجيبها 


الله يخون اللذي يامير معكم يخون = حقاً علينا دروب الطيب نمشيبها


انا وابويه وجدي قبلنا مخلصون = اهل الوفا والمعزه مع معازيبها 


اشيوخنا اللي تشيل الحمل فوق المتون = انجود من جودها وانطيب من طيبها


أهل البيوت الرفيعه جعلهم يسلمون = العز يصبح بها والمجد يمسيبها


الله يبارك لهم فالمال هو والبنون = ويجيرهم من عذاب النار ولهيبها


آمين يا ربٍ أمره بين كاف ونون = نطلبك يالواحد اللي عالم ٍ غيبها