دعوتك تشرف يا\"عبد العزيز بن سعود\" = والعذر لو قلتها لك حاف من دون الأمير


والسبب يا سيدي في طيحة الكلفه يعود = إني والله العظيم اعدك اخوي الكبير


يا طويل العمر ما للشعر وابداعه حدود = كلنا شعار ..لكن \"شاعر آل سعود \"غير


يكفي اني ما عرفت ان العيون السود سود = إلا يوم اني قريت اشعارك ..وسني صغير


اسرق ابياتك وأقول لسيدة هذا الوجود = كاتب بسودك قصيده واسمعني للأخير


\"طحت في حب العيون السود كلي \"يالعنود = تو ما امداني أكمل ..قلت :الله يالخطير


هذي لـ \"السامر\" سكت وما بقى عندي ردود = وهذا موقف من مواقف قس على هذا الكثير


يا بشوش الوجه يالنفس الكريمه يالودود = والله انك في صفاتك شخص منقطع النظير


لا طريت الشعر شعر ولا طريت الجود جود = يعني مدري ويش اقول من التعابير وأثير


يعلم الله إن صيتك ذاع و افعالك شهود = ناصر المظلوم ..فكاك النشب .. عون الفقير


تدري اني من ثلاث أيام .. والعالم رقود = بس احاتي لو بشوفك وش يكون ووش يصير


فرحة تغمر شعوري بس هالفرحه بزود = مابقى الآ يا طويل العمر قدامك أطير 


جيت ماني طامع الا اشوفك بعيني واعود = وطالما شايف سموك فالاكيد اني بخير


جيت تقدير ومحبه في ضيافة بن سعود = هذا ما عندي واطال الله في عمر الأمير