سلام يا شيخ .. به الطيب مقرون = طيبه مطول ..والليالي قصيرة


سلام يا شيخ له من البحر ..لون = وله سطوة امواجه ..وعالي هديره


هذا العطوف اللي على العطف مرهون = المجد له من أوله ..لين أخيره


هذا غزير البحر ..واركونه اركون = محدن إلى جاله سلم من غزيره 


هذا كريم السبله اللي يقولون = الله يكثر طول الأيام خيره


عاقل ولكنه إلى اعطاك مجنون = والله ما يلحق قليله كثيره


هذا الذي لا ضاق في عينك الكون = الكون والدنيا بعينه صغيره!!


والناس تسمع باذن ..وتشوف بعيون = لاشك ما تسمع ..ولا تشوف غيره


عبد العزيز ابن سعود ..ابيض اللون = خلى سواد الوجه .. للي يضيره


هذا ابو راشد له الروح ويمون = المختلف طيب وجود وسيره


لاجاله المديون ..ماراح مديون = تسبق بشاشاتة .. بشاشة بشيره


راعي التقى والدين ..الناس يدرون = انه امام الخير ..في كل ديره


لا ضاقت الدنيا على مغبون = لقى تحت ظله ..ظلال يجيره


والناس له ..وسط المساجد ..ويدعون = على رواية حفص ..وابو هريره


هو البحر ..والبحر بالخير مسكون = هو السماء..ونجومنا له منيره


ابو المكرم ..حطه الله لنا عون = ولاهي مجاديف المكارم ..قصيره 


لا قاموا اصحاب الملايين..يجنون = ارباحهم ..ربحه علوم سفيره


اهل الرياء ..واللي علينا يرأون = يدون بأن افعال خيره..ستيره


اللي استوت مليار عنده ومليون = المال حطه في اللوازم ذخيره


الاشقياء ..في جمعة المال يشقون = والاتقياء..يرجون فضل وبريره


والناس لوانهم يرحون ويجون = قلبه وطن حب وشط وجزيره


وسلمت يا فكاك  .. سجنات مسجون = لا صارت دروب الليالي وهيره


سلمت ..في خيرك..يموتون ..يحيون = ويدوم راي الخير ..ويدوم خيره


والشعر له ساحات..وبداع وفنون = وأنا كتبت اصدق شعر ..في اميره


عبد العزيز ..ان ضاق في عينك الكون = تشوفه بعينك ..ولاتشوف غيره