سمعت طاروق لبو راشد عصير = يبيح المكنون تالي قوافيه


جاوبت طاروقه ومن دون تفكير = اردد الطاروق وارجع وأغنيه


اجاوبه عندي وعندك ترى خير = يا حظ منهو داله البال خاليه


صحيح أنا موطن و ابو راشد امير = بالطيب والله ما خلق من يجاريه


مير الهوى ما فيه هاذي وذي غير =  \" كلن يقول الزين كله بغاليه \"


لي صاحب ما شفت مثله بتصوير = و لا داج منفوق الوطي من يحاليه


ماله شبيه بالبني الغنادير = عند البدو واللي يعدل سواقيه


غرو ليا شفته تحار التفاكير = استغفر الله كيف ربي مسويه


العين عين اللي ثعا بالمخامير = صياد كفه بالثنادي يعشيه


فرخ وحش ما دلهوه الصقاقير = ولا اشر له الصقار بالشلو يدعيه


بعال الهضاب النايفه له مواكير = وشره على الخرب المعلي يوطيه


لا سلهمت جاني بالاعصاب تخدير = من صاب رمشه ما يفيد الدواء فيه


والعنق عنق اللي يقود المذايير = ريم خشيمه من مقيله يجزيه 


ابو نهود دوب نزت مزابير = طلع الزبيدي بالقراره بشاديه


وابو جديل فوق متنه دغاثير = ظاف من الهامه ليا الردف كاسيه 


ادعج غنج ما ينتوصف بتعبير = لو اجتهد بالوصفة الله فلا اوفيه 


لا من طرالي كن بالقلب تفجير = يالله بامانك كل ما حل طاريه


وليا سمعت اسمه ينادي به الغير = قلبي يفز وينعزل من محانيه


لو شافها قايد جيوش وطوابير = خلا القيادة وانصرف له يحيه


ولو شافها بوش الدبليو مع بلير = ساحوا لزوم نحط فيش ونشبيه


ومن مجلس النواب جتهم تقادير = في لستة الارهاب وأول أساميه


 هذا خطر يمشي على الأرض ويسير = من زود زينه يمكن الكون يفنيه


وجدي عليها وجد من ضاع له طير = صقار أمير في طيوره موصيه


والطير نادر من حرار مشاهير = تو الامير بغال الأثمان شاريه


طلع على جول الحبارا المخاشير = تل البق واخطأ من السبق راعيه


ولجد مع اللجه خلاف المدابير = حدم على خرب من الجول باغيه


ويوم انتحا طيره نحن التباصير = وطوح بعال الصوت للطير يدعيه


وعود بيا اللي يلحق الطير بالسير = وركب على اللي نازح البعد يدنيه


جيب الامير اللي لفاله بتصدير = من وارد اليابان توه ملفيه


مشيمه صاحب سموه عن الغير = ما يركبه كود الامير وحواشيه


تله وصر للسير مع حنه القير = من زايد السرعه عجز لا يقديه 


ما طاع عداله ونصاح ومشير = خوف الملامه عقب كثر المشاريه


ان كان ظاع الطير ما فيه تبرير = يبا يجيه من الغثا ما يكفيه 


وركز عجاج الجيب مثل المعاصير = وخاط الشفق واقفا بيمه حراويه


وخمه مع القاره كما ليث مغير = وشاله مطب قبل الأخر يوطيه


ثم حدره من عالي الجال تحدير = الجيب يقلب والدريول يباريه 


الطير راح وكمله بالمخاسير = بالموتر اللي من حفيزه منقيه


عقب الصقاره والولع والصعاطير = محتار في مشيته تخلف مواطيه


وش عاد عنده للمعزب معاذير = باياه وجه يقابله كيف ينبيه


ثم اسنوت عنده جميع المقادير = وعنده خبر أن العذر ما ينجيه


وصوت بعال الصوت يامير يامير = ما قدر الله لبنادم ملاقيه


طيرك تعرض للحبارا المخاشير = لو بندقي معيه لك الله لأرميه


والجيب دونه في شعيبة تنانير = لو ولع الكبريت كملت باقيه


يا شين حظه كان ما به تدابير = يبي الشكاله مير حظه مدهويه


حاله مثل حالي على غرو صغير = عيت مقادير السماء لا تهبنيه


ما فادني صبر ولا فاد تصبير = مدري ويش أسوي أنا بس وأرضيه 


وأنا من أسبابه بشر بلا خير = وبعض الغلا عرفي على كبد راعيه


وأنا أشهد انه طالني بالمخاسير = بالعمله اللي لا ريال ولا جنيه


بالحال والصحة وكثر المشاوير = وسهر الليالي مع مصالي مكاويه


من عام الأول يا بو راشد مداوير = ما سنع العساس علم يقديه


يا ميرنا المنعور واف الأشابير = الأمر طاري والعذر منك مابيه 


خل أني مواطن وخل انك أمير = خله رفيق جاء رفيق مصافيه


جاك المعنى يا بو راشدمن سدير = ما جاك مسيار ولا جاء تقهويه


يبيك تفزع يا ربون المناعير = فزعه سنافي تعزوى لناخيه


مثلك يعرف الوارده والمصادير = والحر مثلك ماني والله موصيه


يمكن على يدينك تجينا التباشير = وطير السعد ما ظن يخلف مباديه


وليا حصل شوفه عن الذنب تكفير = وان طال هجرانه على الله مشاكيه