لاحت بروق الوسم وأستبشر الدار =وتهاملت منه القلايد مباكير 


نوٍ هما ودقه على الخد مدرار=ودار الفلك وجهه لنقالة الطير 


وراع الولع فكره مع الطير يندار=والشوق شره مع الحرار المغاتير 


هذاك الأشقر خص به راهي الأشبار =اللي بوصفه من معزي تعابير 


أسرار تكشف لك بتفسيرها اسرار =فيها لبن عمي أدق التعابير 


أبيه مثلك يابو تركي بالأنظار =وفي مخبره تكمن مزاياك يا مير 


عديمٍ أفضل ما تسميه بتار =وباسمِعك وصفه بادق التفاسير 


جوهر ولع ريشه تماوج لهب نار =تبري ويغري فيه بالشعر تصوير 


وجهه إلى شلت الغبا عنه تحتار=فأوصافٍ أبَينها لفعله تباشير 


مثلك ولا مثله على كف صقار =أنته وهو يا خوي والثالث الزير 


هو سلوتي لا طال في القنص الأسفار=فرخ ٍ وحش يعطيك للظن تبرير 


كنه يقول إجزم وراك أنت محتار =سلمان هو طير الرجال المشاهير 


يا خوي يا عزي نبي دار من دار =وأنت المقدم في جميع التقارير 


نبي المضحى والمعشى فالأقفار =لاستفصلّن معنا الفروخ السواعير 


في روض ٍ أخضر كن خربه إلى طار=طيارةٍ تعطي للإقلاع تحضير 


وانته معك طير ٍ على الجول حشار =إلا على فعلك لفعله تفاسير 


حر الحرار اللي يقودك للأقفار =كنه يقول أطلق لي السير اباطير 


على الخــريــش اللي إلى بـنت له طــــار =خربٍ فقع قدم الدجاج المعاشير 


واللي بشكلك يابو تركي له أختار =عل وعسى يا خوي نسلا الغنادير 


في خايع ٍ متشابكٍ فيه نوار =زهر الربيع وجول ٍ أقفا مدابير 


صفق الحباري درج فالقاع وطيار =بشقر الحرار ورفقة أعلا المناعير 


شوق الولع يلعب بقلبي ولي كار =قفز الحواجز في القنص والمحاذير 


تبعت شف الطير في كل الأمصار =وأنت المميز من ورا كل تنظير 


في الطير والمقنص وفي بدع الأشعار =وفي المجد لك عرش ٍ يقود الجماهير 


واسلم ودم بالمجد في عال الأوكار =وعليك مافور الثناء في المحاظير