جاني كتابك بين يوم ٍ و ليلــــة     =  و قريت بعيوني و بالعقل فحــــــواه


مشكور في وقت ٍ غطا العدل ميله     =   وقت ٍ به الناقد يشكل نوايـــــــــــــاه؟


يا شاعر ٍ لا طاب من طيب جيله  =    و من جاد تظهر به على الطيب يمناه


رايك دليل ٍ فالدروب الطويله       =   يا شاعر ٍ بالعلم تسري مطايــــــــــاه


يا عاشق ٍ هد الغلا العف حيله   =     و هم ٍ يجي قدمه و هم ٍ تقفــــــــــــاه


ما هوب يبني منزله من مسيله    =   تلقى مكانه زامي ٍ فوق مبـــــــــــداه


رجل ٍ شريف من رجال و قبيله    =   فاهم فهم فحوى قصيدي و ناجـــــاه


البارق اللي طافني كيف أخيله    =    و هو على مرباع غيري نثر مــــــاه


دق القصايد يا حمد و الجليله     =    فالغالي اللي جرح القلب و أدمــــــاه


و أقفى يناديني و أنا أزريت أجيله    =    أصيح من بعده و أنا جالس إحـــذاه


خل ٍ جرحني بالعيون الظليله     =     يالله عسى جرح ٍ جرحنيه يرفــــــاه

مشاعر (السامر) مشاعره نبيله    =     يشعر بها قلب ٍ بلي مثل بلـــــــــواه


لا ...... ما نلوم اللي دوابه خليله   =     دوي المعنى قيس في حب ليــــــلاه


حيث الشعر للحب أسمى وسيله     =    كم رقرق إقلوب ٍ قست بالمجافـــــاه


مالي على الزايف عيون ٍ كليله     =     ما فند الزليف سوانا وعـــــــــــــراه


ألفت من (السامر) هديه جزيله       =   و أنا أعتبرها من غوالي هدايــــــاه


شوارد ٍ مثل الحصابي جميلـــه     =     و أحلى الحكي ما سابق اللفظ معناه


ينسج حروفه من ورد الخميله     =      و يشكله عقدٍ على جيد حسنــــــــاه


شعر ٍ رصين اللفظ ناصع دليله      =    يحف به معنى تضوع شذايـــــــــــاه


صاغه لعين اللي رموشه ثليله      =    منها شهاب اللحظ تنضح منايـــــــاه


الصاحب اللي ما رضي عن بديله   =    قلب ٍ تولع به و عقل تبنــــــــــــــــاه


قلت الحقيقه و الحقيقه فضيله      =     يا ما حلى شعر ٍ بخطك قرينــــــــــاه


من تغلب الغلبه رفيع القبيله        =     أهل الكرم و السف و الضيف و الجاه