حرٍ شلع من ديرته تقل منعوب = شلعة ربيبٍ شاف بالرجم جذّاب 


كنّه قطاميٍ على اللوح مجذوب = مخرم وصاحوله على وقت الأغراب 


ثم جاك للجذاب ماهو على الدوب = شاف العشا واللوح في رأس مرقاب 


طالع وله رغبه ولا هوب مغصوب = طلعه على اللي شاف معجبته إعجاب


طلعه على الوضحا الخيار أم دبدوب =غزيزة الخيّال من طرش الاجناب 


اللي لها قلبه عن البيض محجوب= هي رغبته من بد تلعات الأرقاب


درة خليج ٍ ما بها حكي وعيوب = ما تنعطا لاشك جابتها الأسباب 


اصل وفصل مثل الأصيل أم عرقوب = بلعون كاسبها من الشيوخ كساب


انعم بالكساب وياوىّ مكسوب = الله يوفق بين الاثنين الأحباب 


وليا خذا معها له مزوح وعجوب = ارتاح من هم الهوى والهوى طاب 


هذا وهو عند العماهيج مرغوب = يتهايقن لشوفته من ورا الباب


لاشك خلاهن بصوب وعبر صوب = يمة دبي لدارعربين الأنساب 


يبا الذي لو دونها السيف مسلوب = مايوقفه من دونها عقاب وحجاب 


قلبه لها يومي على راس نبنوب = شايم وشامتله على كل طلاّب 


هي غايته ومناه من كل مطلوب = ربيع قلبه لادخل بين الاسلاب


ليا شرب من مبسمٍ كنه الذوب = نعمة خدا لا شرّع الناب بالناب 


وليا قطف وردٍ على الخد مهيوب = طاب الكرا والكيف لحصان الأطلاب


هذا الامير اللي من الله ماهوب = حب البنات الشقر غظات الأشباب


وحب الرجال اللي من اول على العوب = يِردُون لو إنه على قطع الأرقاب 


عوب السبايا لاخذت كل جندوب = اللي عليهن كل فارس ومعطاب 


لو الفشق قدامهم كنه الشوب = يموت واحدهم ولا قولهٍ هاب


ملكهم أميرٍ لهم يقضي النوب = يقوم بالماجوب حلال الانشاب 


ملك قلوب الناس بالمد وإسلوب = إسلوبٍ تجوز لكل عصمان الاشناب


ياعنك ماكفه من البخل مقضوب = يا كثر ما يعطي بلا عد وحساب 


راع الكرم محبوب والبخل عذروب = تلقا البخيل بغيض لو عند الاقراب


سميّ خاله ناطحن كل ماجوب = ولاهو غريب منه طيبه ليا طاب 


من راعي الأجرب معرب ومجذوب = سعود ابوه ليا وصله الحكي شاب 


هذا الذي طيبه من الله مكتوب = نسل الملوك مهدّيت روس الأصعاب


 عبد العزيز اللي له الاسم منسوب = السامر المعروف مع كل هّباب


اسمٍ صعد به قمة المجد يعقوب = واللي عطاه المرجله رب الأرباب


قلته وانا عن مدح الامجاد ماتوب = قلبي لهم عشاق من يوم وانا شاب