لاحصل في الوقت هفوات وامجادي = يا مجاهيم الزمان ومغاتيره 


ما تغير شي من طبع الاجوادي = والموارد كل دلوٍ على بيره


عيشة الدنيا تبي صبر واجهادي = لين راعي الذود يبهل مصاريره


والزمان يدور هجري وميلادي = والورق الاخضر تغرد عصافيره


لي ثلاث شهور سراد مردادي = اجتلد والحلم ياصعب تفسيره


والرياض ان جيتها جوها هادي = للشبح وقفه ولفه وتدويره


عند قصرٍ يعتلي الحي من غادي = حالفٍ انه مايوقف على غيره


لو يغيب هلال شعبان وجمادي = مالي الا احط ديره بدل ديره


وان دعاني سيدي جيت متحادي = باسبورتي ما يبي غير تاشيره


والتكيت مقصوص والصبح ميعادي = في مطار العاصمة ماش تاخيره


ركبو الركاب والنور منقادي = واعلن الكبتن وشغل مواطيره


واستدارت حسها حس رعادي = كنها وضحاً ترزم على ضيره 


وارسل الكبتن مع برج الارصادي = وتلها يم السما لعنبو غيره


ما تكيف كيف دله وبرادي = ما يكيف راسه الا من البيره


والمسافه كلها وضعها عادي = ناصيٍ شيخ ٍ تبشر تباشيره


يوم اقبل منكبه ثالث اعيادي = كل يوم يزود حبه وتقديره


نفح جوده نفحة المسك والكادي = اتجمل وابذل الخير من خيره


وازبنه لا حدني في الزمن حادي = لا حصل في الوقت هجمه وتمريره 


اعتلي راس الجبل واترك الوادي = لا حدر سيل الجبل مع محاديره


يا نهر دجله ويا شط بغدادي = لا قصر موج البحر عن بوابيره


عيلمٍ يقطع ظما كل ورّادي = وفي غنا عن كل مدحه وتبريره 


سمعته مثل القمر نورها بادي = فارضٍ نفسه بطيبه وتقديره