يا سعود ساعدني على حر الأشواق = صمتي قهر وان صحت قالوا فضيحه


ما يستوي حبٍ على هجر وفراق = يا ويلكم يا أهل القلوب الجريحه


إن ما تصافينا على حسن الأخلاق = إن مت قولوا جعل ربي يبيحه


لا ما يوسع خاطري كل ما ضاق = إلا وعود ٍ بالمواصل صحيحة


قلبي سرقه اللي للألباب سرّاق = وراع الهوى لا طاح يكثر مطيحه


إلى ذكرت اللي معي سلكه دقاق = يا سعود من فرقاه جريت صيحة

لا باس يا شاكي خطا جرح الأعماق = هذا الهوى منته لحالك طريحه


ذوّيق وذوقك يختلف بين الأذواق = ما تحتويك الا العيون الذبيحه


شبك يالحر النداوي على ساق = واقفى بقلبك والليالي شحيحة 


الهاجر اللي من بعده الفضا ضاق = لولاه غالي ما استفز القريحه


يرجع مثل ما كان لا يحرق احراق = قلب ٍ يوده كان يبغى النصيحه


وانا معك لو تطلب الروح تنساق = إلا بعينك لا تضيق الفسيحه


 يا ليت لو تكشف لنا بعض الأوراق = حتى نبرمج فالجهاز الشريحه