ناصيك يالسامر وكلي عشم فيك = واصل العشم من طيب ساسك ومجناك


احمل هديه لجل حضرتك واهديك = حرٍ تنومس عقب ما سمع طر ياك


حرٍ نهض مثلك ويسري مساريك = يسريك ما يلهيك ويطول مسراك 


يالسامر اللي منبع الجود بيديك = وساس الفخر دربه من ادناك لقصاك


يا علني يالسامر اموت مبكيك = واموت ما افارق بشاشة محياك


يال السعود امحللين الشرابيك =  سيد الامم ما بين ذولا وذولاك


اهديك لن الطيب منهج مباديك = واهديك لنّك ساس عزٍ لمن جاك


الطيب طيبك والمناصي منصيك = والعرف عرفك والسجايا سجاياك


وينصاك من صعبت عليه المساليك = ومن ضامته دنياه واحتار ينصاك


رقيت للعليا وصعبه مراقيك = ونلت المعالي واتعبت غيرك اخطاك


خسران من حاول ابطيبه يجاريك = يالنادر اللي كل الامداح تزهاك


ماخاب منهو بالمواجيب يحريك = ولا خاب ابوك اللي على الطيب رباك


انا ادري ان المدح ما هوب مكفيك = من طيب وقفاتك ومن طيب يمناك


لك مع كبار الجاه حظ ومداريك = ياخذ ويعطي مع هل القدر شرواك


وفيديك موضوعي عسا الله يعافيك = وخوتك غاية مطلبي لا عدمناك