من عادة الطيب ليا من عطا سد = وأنت العطى من مد كفك يزودي


فعايلك تشهد على جزلة المد = يمناك في درب المكارم تجودي


انا اقول وفعلك اليوم يشهد =  مواقفك في كل وقت ٍ تعودي


ماني بمادح وانتظر لاجلها حمد = الله على ما قلت خير الشهودي


في كل فج ٍلك علامه ومشهد = وجيوش خيرك ما تعرف الركودي


لا جيت يمه والصواديف لك ضد = ابشر بسعدك دام كنت محدودي


اسأل مريض جاه شاكي ومشتد = هد السقم حاله وفت العضودي


وإلا فقير ٍ من ديونه تنكد = هم ٍ حشد وسط قلبه جنودي


وإلا يتيم ٍ بات دمعه على الخد =دارت به الدنيا ولا له سنودي


والا هذاك وذاك يصعب بها العد =هذي حقايق ناصعه للوجودي


ماهي غريبه دام تعطي بلا حد = منبع أصولك من عريب الجدودي 


عبد العزيز سعود يا طيب الجد = يسلم جبينك من عيون الحسودي


تسلم ويسلم عود رباك في المهد =يالله عسى الجنه له احلى ورودي


ويجزاك رب الكون في جنة الخلد =تنعم بها من غير هم وسهودى


وختامها صلوا على الهادي احمد = نبينا اللي دك حصن اليهودي