عز الرياض وعز وادي حنيفة=وعز الأمارة والأمور العظايم


عدل الحكم سلمان بالعز ريفه=خمسين عامٍ كل أبوها غنايم


تبصر بعدله عين حيٍ كفيفه=المجد له والطيب والعز دايم


وتقصر بحكمه كل يمنىً عنيفه=عن بطشها سلمان عوق الخصايم


المنهج القرآن والشرع سيفه=وسلمان عدله يرتكي للظلايم


وتنصر بعزه كل رملاً ضعيفه=ذاقت من أسباب الحياة الهضايم


كفه لدمعات اليتامى وليفه=ياما مسح دمعٍ للأوجان رايم


وليا جمد دم العروق الصخيفه=وطير المنايا في سما الحبس حايم


جاه الذي ياخذ من السيف ضيفه=ويعتق رقابٍ راهنتها غرايم


من عقب ماهي للسيوف الرهيفة=من فضل أخو نورة كستها عمايم


بالجاه فاديها فدتها الكليفة=وبالمال شاريها ولا هوب سايم


خمسين عامٍ والأيادي عفيفة=لكن على المحتاج مثل الغمايم


خمسين عامٍ وخدمة الشعب كيفه=ما قيل ما داوم ولا قيل نايم


و طويق يدري ما على نجد خيفة=وأبو فهد في ماكر العز قايم


يرسي كما ترسي الجبال المنيفة=ويرقى على متن القمر والنعايم