عز الرياض و عز وداي حنيفة=و عز الأمارة و الأمور العظايم


عدل الحكم سلمان بالعز ريفه=خمسين عامٍ كل ابوها غنايم


تبصر بعدله عين حيٍ كفيفة=المجد له و العز و الطيب دايم


لا ثقلت القالات عنده خفيفه=قدّام عزمه يصغرن الجسايم


أنا اشهد انه للشدايد خليفه=إمام عدل و ماضيٍ له قدايم


وريث عودٍ باللقاء ما يخيفه=لمع السيوف مهبطات العزايم


عبدالعزيز و موطن العدل سيفه=يوم إن عسرات الليالي تزايم


وحد بلادٍ للولاء مستظيفه=و ساد الامن من عقب ماهي ظلايم


و عقب حرارٍ للامور الصليفه=وقفاتهم بالضيق تجلا اللوايم


من هو يحاول بالبلاد الشريفه=على هوان الذل يلبس عمايم


سلمان يا ستر الرياض العفيفة=تمت حروفي و الوفاء له تمايم


يا سيدي ما فيه شيٍ أضيفه=إلا أن حبك بالوطن له علايم


تبقى حروفي عن وصوفك كليفه=و يبقى سموك في سما العز حايم


و كل السعود اشجار عزٍ وريفه=هم ظلنا عن لاهبات السمايم


صفحاتهم بالمجد ما هي قضيفه=لهم الفخر و المدح و الطيب شايم