طهور يا اخو الفهد يابو الفعول الجسام=ما بالعرب والعجم مثلك بعصره عظيم


طهور يا سيد الجود وملاذ الكرام=يا جامع سطوة تخشى وكف كريم


طهور يا نورنا في مدلهم الظلام=يكفيك شر المرض والسو رب رحيم


طهور يا محقق بالطيب كل المرام=يمنا تمد الجزيل.. وراي راس حكيم


طهور ياللي شمل خيرك جميع الأنام=أغنيت معسر.. وعالجت المريض السقيم


طهور يا مظلل بالعطف والاهتمام=من لاذ بك شاكي من ميل الايام ضيم


ياللي لكل الفضايل في يمينك زمام=ما بين راسك ويمناك الفخر مستديم


طيبك اللي ضاق ميدان الفخر بالزحام=يصير للطيب كله يابو خالد زعيم


يفخر بك الشعر وانت أعز واعلى مقام=وتفخر بك الدار واللي في ثراها مقيم


يا كثر من يرفع يدينه لمنشى الغمام=في تالي الليل يدعى من بخلقه عليم


يدعي بخفقات قلبه قبل نطق الكلام=ويلح بدعاه للرب الكريم الحليم


يجزاك طول العمر ويزيل عنك السقام=يا ماسح بعطفك الفياض دمع اليتيم


الله يزيل الألم ويصير برد وسلام=ويحفظ للامجاد راع المنهج المستقيم


عيد الوطن والمواطن مثل عيد الصيام=شوفتك عقب الغياب بقدرة الله سليم